ەراعامىزدى جەرلەپ كەلدىك... بارشىن اۋىلى راسىمەن دە الىس ەكەن، جولدىڭ جارتىسى قارا جول. توقىم سۋلاپ، تۇياق توزدىرىپ جەتكەن مىڭداعان ادامعا قاراپ اعامىزدىڭ باعاسىن بىلدىك. كوپتىڭ ىشىندە اۋىل شارۋاشىلىعى ۆيسە-مينيسترى ارمان ەۆنەيەۆ تە بولدى. سول كىسىنىڭ اۋزىنان:

"ءبىزدىڭ مينيسترلىكتىڭ بۇكىل 500 قىزمەتكەرى ءبىر كۇندىك جالاقىسىن (4 ملن تەڭگە) بەرەدى. ەرلان نۇرعالييەۆتى "ەرلىگى ءۇشىن" مەم.ماراپاتقا ۇسىندىق".

اۋىلداستارى ەراعاعا «بۇل ماداق از» دەيدى، سەبەبى ومىرىندە كوپتەگەن جاندى وت پەن سۋدان قۇتقارىپ قالعان ەكەن. 20 شاقتى جىل بۇرىن ۋچاستكوۆىي بولعانىندا اينالاسىنداعى بۇزىقتىقپەن اتى شىققان اۋىلدى تارتىپكە سالعان. "فورماڭا راحمەت ايت، ايتپەگەندە وسى جەردە ولەر ەدىڭ"، -دەگەن باۋكەسپەلەردىڭ سوزىنەن كەيىن، ۇيىنە بارىپ فورماسىن شەشىپ، سپورت كيىمىن كيىپ، بۇزاقىلاردى جەكپە-جەككە شاقىرىپ جىندارىن باسقان ەكەن. وسى قاڭتاردىڭ 30-دا 53-كە تولۋى كەرەك ەدى...

جالعىز ۇلىنان ءۇشىنشى نەمەرەنى كۇتكەن اعامىزدىڭ كەلىنى كەشە عانا اۋرۋحاناعا تولعاقپەن تۇسكەن. "كەلىنىم مەنىڭ تۋعان كۇنىمە وتە تاماشا سىيلىق جاساماقشى"، -دەپ تويعا سويار مالدى ءوزى جەمدەپ ءجۇرىپتى. ال قايعىلى وقيعا كۇنى، براكونەرلەردىڭ ەكەۋىن جالاڭ قولمەن جايراتىپ تاستاعان، قولدارىنا كىسەن سالىپ جاتقاندا ارتىنان ءۇشىنشى ادام كەلىپ جەلكەسىنەن مىلتىقپەن ۇرىپ، ارتىنشا وزگەلەرى كەلىپ تۇرعىزباي تەپكىگە جىققان. بۇل ساتتە ەكىنشى ينسپەكتور ەس-تۇسسىز جاتقان...

ەندى اعامنىڭ قىزمەتى جايلى بىرەر ءسوز. تابيعاتتى قورعاۋ ساقشىلارى 15 كۇنگە ۇيىنەن جىراق كەتىپ جۇمىس ىستەيدى، ايلىقتارى 100 مىڭعا جەتەر-جەتپەس. ءاربىر كۇندەرى ءقاۋىپ پەن تاۋەكەلگە بايلانعان. سوڭعى ءۇش جىلدا ينسپەكتورلارعا 10-استام شابۋىل جاسالعان، سونىڭ بىرەۋىندە عانا قىلمىستىق ءىس قوزعالىپتى. كوبىندە ايىپتىلار وڭاي قۇتىلىپ كەتەدى، ءتىپتى تابىلعان ءولى كيىكتەردىڭ تەرگەۋ بارىسىندا ەشكىنىڭ ەتى دەپ جازىلاتىنىن بىلەسىز بە؟ ال اقبوكەننىڭ ەتى ەكەنى دالەلدەنسە، ايىپتىلار ايىپپۇل تولەپ كەتە بەرەتىنىن شە، ەستىپ پە ەدىڭىز؟ ادام ومىرىنە ءقاۋىپ ءتوندىرۋ، ولتىرۋگە تالپىنۋ دەگەن بىردە-بىر ءىس قوزعالمايدى! سەبەبى - اقشا!

"كيىكتىڭ ءمۇيىزىنىڭ 1 كەلىسى 2 مىڭ ەۋرو، ءۇش ءمۇيىزدىڭ ءوزى 1 كيلو تارتادى، ول قىتايعا كەتەدى"، - بۇل ءمينيستردىڭ ورىنباسارى ارمان ەۆنەيەۆتىڭ ايتقانى! ال اڭشىلار استە كەدەي ادامدار ەمەس، سوڭعى ماركالى «دجيپتەرمەن»، قىمبات قۇرال-سايماندارىمەن جۇرەدى، مۇيىزدەر قىتايعا ساتىلسا، وتكىزۋ نارىعى بار، ونى "دوكەيلەر" باسقارىپ وتىر دەگەن ءسوز! تاعى ءبىر ماسەلە، تابيعات ساقشىلارى پوليسەي، نە اسكەري قىزمەتكەر بولىپ سانالمايدى، ولار بۇزاقىلارعا جاۋاپ رەتىندە وق اتسا، كوپ جاعدايدا سوت ولارعا "اتۋىڭا قانداي نەگىز بولدى؟ ءبىرىنشى ساعان وق اتىلدى دەگەن دالەلىڭ بار ما؟"، -دەپ وزدەرىن كىنالى قىلىپ شىعارادى ەكەن. سونداي-اق، براكونەرلەر تراسساعا شىعىپ كەتسە، ولاردى ۇستاۋعا تابيعات ساقشىلارىنىڭ قۇقى جوق، سەبەبى ول جول پوليسياسىنىڭ وكىلەتتىگىندە. زاڭ سولاي، قايتەسىز ەندى... ءبارى اۋىز جالاسقان، شىنجىر سياقتى بىر-بىرىنە بايلانعان قىلمىستىق جۇيە، توردە وتىرعان تورەلەرى دە كوپ، ولار جاۋاپقا تارتىلادى دەۋ ەرتەگى! قىسقاسى تابيعات ساقشىسى بولىپ جۇمىس ىستەۋ ءۇشىن نە اقىماق بولۋ كەرەكسىڭ، نە ەرلان نۇرعالييەۆ سياقتى جان-جانۋاردى جانىڭداي جاقسى كورۋ كەرەكسىڭ! دالانىڭ يەسىن ولتىرگەندەردى، كيىكتىڭ كيەسى ۇرماي قويمايدى! توپىراق سالۋعا كەلگەن جانە ەسكە الىپ سويلەگەن ادامداردى كورىپ بىرەۋ ەراعاڭدى باي-ماناپ، شەندى-شەكپەندى دەپ ويلار، ولاي ەمەس، ول - ادام، كىسى ەمەس ناعىز ادال ادام بولعان! جانىڭ ءجانناتتا بولسىن، ەسىل ەر!

جالعاس زەينوللايەۆتىڭ فەيسبۋك پاراقشاسىنان